Header Ads
Header Ads
Breaking News

ಅಂತಿಮ ಹಂತಕ್ಕೆ ತಲುಪಿದ ಬಂದರಿನ ನಿರ್ಮಾಣ ಕಾಮಗಾರಿ

ಮಂಜೇಶ್ವರ: ಜಿಲ್ಲೆಯ ಮೂರನೇ ಬಂದರಾಗಿ ಭಾರೀ ನಿರೀಕ್ಷೆಗಳಿರುವ ಮಂಜೇಶ್ವರ ಮೀನುಗಾರಿಕೆ ಬಂದರಿನ ನಿರ್ಮಾಣ ಕಾಮಗಾರಿ ಅಂತಿಮ ಹಂತಕ್ಕೆ ತಲುಪಿದೆ. ಈ ಬಂದರು ಲೋಕಾರ್ಪಣೆಗೊಳ್ಳುತ್ತಿರುವಂತೆ ಜಿಲ್ಲೆಯ ಅತಿ ದೊಡ್ಡ ಮಿನುಗಾರಿಕೆ ಬಂದರು ಎನಿಸಲಿದೆ.ನಿರ್ಮಾಣ ಕಾಮಗಾರಿಗಳಲ್ಲಿ ಹೆಚ್ಚಿನವು ಪೂರ್ಣಗೊಂಡಿರುವುದಾಗಿ ಮೀನುಗಾರಿಕೆ ಬಂದರು ಅಧಿಕಾರಿಗಳು ತಿಳಿಸಿದ್ದಾರೆ.2019ರ ಫೆಬ್ರವರಿಯಲ್ಲಿ ಮಂಜೇಶ್ವರ ಮೀನುಗಾರಿಕೆ ಬಂದರನ್ನು ಕಾರ್ಯಾರಂಭಗೊಳಿಸಲು ಸಾಧ್ಯವಿದೆ ಎಂಬ ನಿರೀಕ್ಷೆ ಇದೆ. ಉತ್ತರ ಭಾಗದ ಬೋಟು ಲಂಗರು ಹಾಕುವ ಸ್ಥಳ ಪ್ರಸ್ತುತ 530 ಮೀಟರ್ ಉದ್ದವಿದೆ. ಇದನ್ನು ಇನ್ನೂ 200 ಮೀಟರ್‍ನಷ್ಟು ವಿಸ್ತರಿಸಲು ತೀರ್ಮಾನಿಸಿ ಕಾಮಗಾರಿ ನಡೆಸಲಾಗುತ್ತಿದೆ.ಕಾಸರಗೋಡು ಅಭಿವೃದ್ದಿ ಪ್ಯಾಕೇಜ್‌ನಡಿ 14.7 ಕೊಟಿ ರೂ.ನ ಆಡಳಿತಾನುಮತಿಯ ನಿಧಿಯೊಂದಿಗೆ ಈ ಬಂದರು ನಿರ್ಮಾಣ ಅಂತಿಮ ಹಂತದ ಕಾಮಗಾರಿನಡೆಯಲಿದೆ. ಮುಂದಿನ ವಾರದಲ್ಲಿ ಟೆಂಡರ್ ಪ್ರಕ್ರಿಯೆ ಆರಂಭಿಸಲಾಗುವುದು. ಬಂದರಿಗೆ ಹೊಂದಿಕೊಂಡು ನಿರ್ಮಿಸುವ ಅಳಿವೆಬಾಗಿಲು ಸೇತುವೆಗೆ ಆಡಳಿತಾನುಮತಿ ಲಭಿಸಿದ್ದು, 16.7ಕೋಟಿ ರೂ. ವೆಚ್ಚ ನಿರೀಕ್ಷಿಸಲಾಗುತ್ತಿದೆ

.ಈ ಮೊತ್ತಕ್ಕಿರುವ ಅಂದಾಜು ಪಟ್ಟಿಯನ್ನು ಕಾಸರಗೊಡು ಅಭಿವೃದ್ಧಿ ಯೋಜನೆಯ ತಾಂತ್ರಿಕ ಅನುಮತಿಗಾಗಿ ಸಲ್ಲಿಸಲಾಗಿದೆ. ವಿಳಂಬಗೊಳ್ಳದೆ ಇದು ಲಭ್ಯವಾಗಲಿದೆ ಎಂಬ ನಿರೀಕ್ಷೆ ಇದೆ. ಉತ್ತರ ಭಾಗದ ಬೋಟು ಲಂಗರು ಹಾಕುವ ಸ್ಥಳ 530 ಮೀಟರ್, ದಕ್ಷಿಣ ಭಾಗದ ಬೋಟು ಲಂಗರು ಹಾಕುವ ಸ್ಥಳ490ಮೀಟರ್, ವಾರ್ಫ್100 ಮೀಟರ್ ವಿಸ್ತರಿಸಬಹುದಾಗಿದೆ. ಹರಾಜು ಸ್ಥಳ, ಲೋಡಿಂಗ್ ಏರಿಯಾ, ರಿಕ್ಲಮೇಶನ್ ಡ್ರಜ್ಜಿಂಗ್ 71000 ಕ್ಯೂಬಿಕ್ ಅಡಿ, ಕ್ಯಾಂಟೀನ್, ನೆಟ್ ಮೆಂಟಿಂಗ್ ಶೆಡ್, ವರ್ಕ್‌ಶಾಪ್, ಗೇರ್ ಶೆಡ್, ಅಂಗಡಿ ಕೊಠಡಿಗಳು, ವಿಶ್ರಾಂತಿ ಕೇಂದ್ರ, ಶೌಚಾಲಯಗಳು, ಗ್ರೀನ್ ಬೆಲ್ಟ್, ಪಾರ್ಕಿಂಗ್ ಏರಿಯಾ ಕಾಮಗಾರಿ ಪೂರ್ಣಗೊಂಡಿದೆ. ಆವರಣ ಗೋಡೆ ನಿರ್ಮಾಣ, ಅಪ್ರೋಚ್ ರಸ್ತೆಯ ಕಾಮಗಾರಿ ಪ್ರಗತಿ ಹಂತದಲ್ಲಿದೆ.ಶುದ್ಧ ನೀರು ವಿತರಣೆ, ಗೇಟ್, ಗೇಟ್ ಹೌಸ್, ವಿದ್ಯುದೀಕರಣ ಮೊದಲಾದುವುಗಳ ಕೆಲಸಗಳು ಬಾಕಿಯಿದ್ದು, ಟೆಂಡರ್ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿ ನಿರ್ಮಾಣ ಆರಂಭಿಸಲಾಗುವುದು. ಪ್ರವಾಹ ಸಂದರ್ಭ ಈ ಮೀನುಗಾರಿಕೆ ಬಂದರಿನಲ್ಲಿ ಸಣ್ಣ ಪ್ರಮಾಣದಲ್ಲಿ ಹೂಳು ತುಂಬಿಕೊಂಡಿದ್ದು, ಅದನ್ನು ತೆರವುಗೊಳಿಸಲು ಒಂದೂವರೆ ಕೋಟಿ ರೂ.ನ ಅಂದಾಜು ಪಟ್ಟಿಯನ್ನು ತಯಾರಿಸಿ ಸಲ್ಲಿಸಲಾಗಿದೆ. 2014ರ ಫೆಬ್ರವರಿ ೨೦ರಂದು ಮುಖ್ಯಮಂತ್ರಿಯಾಗಿದ್ದ ಉಮ್ಮನ್ ಚಾಂಡಿಯವರು ಮಂಜೇಶ್ವರ ಮೀನುಗಾರಿಕೆ ಬಂದರಿನ ನಿರ್ಮಾಣ ಕಾಮಗಾರಿಗೆ ಶಂಕುಸ್ಥಾಪನೆ ನಡೆಸಿದ್ದರು.ಒಟ್ಟು 48.8 ಕೋಟಿ ರೂ. ಮೀನುಗಾರಿಕೆ ಬಂದರ್‍ನ ನಿರ್ಮಾಣ ವೆಚ್ಚವಾಗಿ ಅಂದಾಜಿಸಲಾಗಿದೆ. ಅಳಿವೆಬಾಗಿಲು ಸೇತುವೆ, ಬೋಟು ಲಂಗರು ಹಾಕುವ ಸ್ಥಳದ ವಿಸ್ತರಣೆ ಸಹಿತ ಒಟ್ಟು 79.8 ಕೋಟಿ ರೂ. ನಿರ್ಮಾಣ ವೆಚ್ಚವಾಗಿ ಏರಿಕೆಯಾಗುವ ಸಾಧ್ಯತೆ ಈಗಿನದು.ಯೋಜನಾ ವೆಚ್ಚದ ಶೇ. 75ರಷ್ಟು ಕೇಂದ್ರ ನಿಧಿಯಿಂದ, ಶೇ. ೨೫ರಷ್ಟನ್ನು ರಾಜ್ಯ ಸರಕಾರದ ಅನುದಾನದಿಂದ ವಿನಿಯೋಗಿಸಲಾಗುವುದು. ಮೀನುಗಾರಿಕೆ ಬಂದರು ಕಾರ್ಯಾಚರಿಸಲು ಆರಂಭಿಸುವುದರೊಂದಿಗೆ 4000ಕಾರ್ಮಿಕರಿಗೆ ನೇರವಾಗಿ ನೌಕರಿ ಲಭ್ಯವಾಗಲಿದೆ. 300 ಬೋಟುಗಳಿಗೆ ಮೀನುಗಾರಿಕೆಗೆ ಸೌಕರ್ಯ ಲಭಿಸಲಿದೆ. ಕಾಞಂಗಾಡ್‌ನಿಂದ ಮಂಗಳೂರಿನ ಪಣಂಬೂರಿನವರೆಗಿನ ಕರಾವಳಿ ವಲಯ ಮೀನು ಕಾರ್ಮಿಕರು ಇಲ್ಲಿ ಮೀನುಗಾರಿಕೆಗೆ ಆಗಮಿಸುತ್ತಾರೆ. ಪುಣೆ ಕೇಂದ್ರವಾಗಿರುವ ಸಿಡಬ್ಲ್ಯೂಸಿಆರೆಸ್ ಸಂಭಾವ್ಯ ಅಧ್ಯಯನ ನಡೆಸಿದೆ.
ವರದಿ: ರೆಹಮಾನ್ ಮಂಜೇಶ್ವರ

Related posts