Header Ads
Header Ads
Breaking News

ಆಳ್ವಾಸ್ ಇಂಜಿನಿಯರಿಂಗ್, ಅಲಹಾಬಾದ್ ಐಐಐಟಿ ನಡುವೆ ಒಡಂಬಡಿಕೆ ನಿರ್ದಿಷ್ಟ ಕಾರ್ಯಸೂಚಿಗಳ ಪ್ರಕಾರ ಸಂಸ್ಥೆಗಳು ಕಾರ್ಯನಿರ್ವಹಿಸಲಿವೆ

ಮೂಡುಬಿದಿರೆ: ಅಲಹಾಬಾದ್‌ನ ಪ್ರತಿಷ್ಠಿತ ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆ ಹಾಗೂ ಆಳ್ವಾಸ್ ಇಂಜಿನಿಯರಿಂಗ್ ಕಾಲೇಜುಗಳು ಶೈಕ್ಷಣಿಕ ಒಡಂಬಡಿಕೆ ಮಾಡಿಕೊಂಡಿದ್ದು, ಅದರ ನಿರ್ದಿಷ್ಟ ಕಾರ್ಯಸೂಚಿಗಳ ಪ್ರಕಾರ ಈ ಸಂಸ್ಥೆಗಳು ಕಾರ್ಯನಿರ್ವಹಿಸಲಿವೆ. ಸಂಶೋಧನೆ ಮತ್ತು ಅಭಿವೃದ್ಧಿ, ವಿದ್ಯಾರ್ಥಿ ವಿನಿಮಯದಂತಹ ಮಹತ್ತರ ಆಶಯಗಳನ್ನು ಹೊಂದಿರುವ ಈ ಒಡಂಬಡಿಕೆಗೆ ಅಲಹಾಬಾದ್‌ನ ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆಯ ರಿಜಿಸ್ಟ್ರಾರ್ ಡಾ. ಶ್ರೀಶು ವರ್ಮಾ ಹಾಗೂ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಮ್ಯಾನೇಜಿಂಗ್ ಟ್ರಸ್ಟಿ ವಿವೇಕ್ ಆಳ್ವ ಸಹಿ ಮಾಡಿದರು. ಅಲಹಾಬಾದ್ ಐಐಐಟಿಯ ನಿರ್ದೇಶಕ ಡಾ. ಪಿ.ನಾಗಭೂಷಣ್ ಹಾಗೂ ಉಭಯ ಸಂಸ್ಥೆಗಳ ಹಿರಿಯ ಪ್ರಾಧ್ಯಾಪಕರ ಸಮ್ಮುಖದಲ್ಲಿ ಒಡಂಬಡಿಕೆಗೆ ಸಹಿ ಹಾಕಲಾಯಿತು. ಶೈಕ್ಷಣಿಕ ಸಂಸ್ಥೆಗಳಿಗೆ ಅಗತ್ಯವಾಗಿರುವ ಜ್ಞಾನ ವಿನಿಮಯ, ತಂತ್ರಜ್ಞಾನ ಸಂಬಂಧೀ ವಿಷಯಗಳಲ್ಲಿ ಸಹಭಾಗಿತ್ವ, ಶಿಕ್ಷಣ, ಸಂಶೋಧನೆ ಹಾಗೂ ಪಬ್ಲಿಕೇಶನ್ ಕ್ಷೇತ್ರದ ಅವಶ್ಯಕತೆಗಳನ್ನು ಈ ಒಪ್ಪಂದ ಪೂರೈಸಲಿದೆ. ಇದರ ಜೊತೆಗೆ ವರ್ಕ್‌ಶಾಪ್, ಕಾನ್ಫರೆನ್ಸ್ ಹಾಗೂ ಸೆಮಿನಾರ್‌ಗಳ ಜಂಟಿ ಆಯೋಜನೆ, ಕೋಡಿಂಗ್ ಕುರಿತಂತೆ ಕೌಶಲ್ಯಾಭಿವೃದ್ಧಿ ಕೋರ್ಸ್‌ಗಳ ಆರಂಭ, ವೃತ್ತಿ ತರಬೇತಿ, ವಿನೂತನ ಸಂಶೋಧನೆಗಳ ಕುರಿತಂತೆ ಆಹ್ವಾನಿತ ವಿದ್ವಾಂಸರಿಂದ ವಿಶೇಷೋಪನ್ಯಾಸಗಳು, ಉಪನ್ಯಾಸಕ ವೃಂದದ ಕೌಶಲ್ಯಾಭಿವೃದ್ಧಿ ಕುರಿತ ಕಾರ್ಯಾಗಾರಗಳು ಒಡಂಬಡಿಕೆಯಲ್ಲಿ ಮಹತ್ವದ ಸ್ಥಾನ ಪಡೆದುಕೊಂಡಿವೆ. ಎಂ.ಟೆಕ್ ಹಾಗೂ ಪಿ.ಹೆಚ್‌ಡಿ ಕ್ಷೇತ್ರಗಳ ಕ್ಷೇತ್ರಗಳ ಜಂಟಿ ಸಂಶೋಧನೆಗಾಗಿ ಒಪ್ಪಂದ ಹಾಗೂ ಕೋಡಿಂಗ್ ಹಾಗೂ ಹ್ಯಾಕಥಾನ್ ಕುರಿತ ಕಂಟೆಸ್ಟ್‌ಗಳನ್ನು ಏರ್ಪಡಿಸಲು ಪರಸ್ಪರ ಸಹಕಾರ ನೀಡುವಿಕೆ ಕೂಡ ಇದರ ಮುಖ್ಯ ಅಂಶಗಳಾಗಿವೆ. ’ಭವಿಷ್ಯದಲ್ಲಿ ಅತ್ಯುತ್ತಮ ಸಾಧನೆಗಳನ್ನು ಮಾಡಲು ಹಾಗೂ ಪ್ರಗತಿ ಸಾಧಿಸಲು ಈ ಒಡಂಬಡಿಕೆ ಪೂರಕವಾಗಲಿದೆ’ ಎಂದು ಉಭಯ ಸಂಸ್ಥೆಗಳು ತಿಳಿಸಿವೆ.ಪ್ರತಿಷ್ಠಿತ ಸಂಸ್ಥೆಗಳ ನಡುವೆ ನಡೆದ ಈ ಶೈಕ್ಷಣಿಕ ಒಪ್ಪಂದದ ಅಧಿಕೃತ ಹಸ್ತಾಂತರ ಪ್ರಕ್ರಿಯೆಯು ಆಗಸ್ಟ್ ೨೩ರಂದು ಮಿಜಾರಿನ ಆಳ್ವಾಸ್ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ನಡೆಯಲಿದೆ. ಈ ಸಂದರ್ಭದಲ್ಲಿ ಅಲಹಾಬಾದ್‌ನ ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆಯ ನಿರ್ದೇಶಕ ಡಾ.ಪಿ.ನಾಗಭೂಷಣ್ ಹಾಗೂ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ.ಎಂ.ಮೋಹನ್ ಆಳ್ವ ಉಪಸ್ಥಿತರಿರುವರೆಂದು ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ತಿಳಿಸಿದೆ.ಅಲಹಾಬಾದ್‌ನ ಐಐಐಟಿ ಭಾರತೀಯ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಪ್ರಮುಖ ಸಂಸ್ಥೆಯಾಗಿದೆ. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಸ್ವದೇಶೀ ಪರಿಕಲ್ಪನೆಯನ್ನು ಬಲಪಡಿಸುವ ಹಾಗೂ ಅದಕ್ಕೊಂದು ವಿಶೇಷ ಆಯಾಮವನ್ನು ಕಲ್ಪಿಸುವ ನಿಟ್ಟಿನಲ್ಲಿ ಭಾರತ ಸರಕಾರ ಇರಿಸಿದ ಮಹತ್ವದ ಹೆಜ್ಜೆ ಇದು. ಈ ಕ್ಷೇತ್ರಕ್ಕೆ ಸಂಬಂಧಿಸಿದ ಸಂಶೋಧನೆ, ಅಭಿವೃದ್ಧಿಗೆ ಹೆಚ್ಚು ಒತ್ತು ಕೊಡುವ ಮೂಲಕ ಭಾರತೀಯ ವಿದ್ಯಾರ್ಥಿಗಳನ್ನು ಎಲ್ಲಾ ಆಯಾಮಗಳಿಂದಲೂ ಈ ಸಂಸ್ಥೆ ಸಬಲರನ್ನಾಗಿಸುತ್ತಿದೆ. ಈ ಮೂಲಕ ಜಾಗತಿಕ ವೇದಿಕೆಯಲ್ಲಿ ಭಾರತಕ್ಕೆ ವಿಶೇಷ ಸ್ಥಾನ ಕಲ್ಪಿಸುವ ಆದ್ಯತೆಯನ್ನು ಅಲಹಾಬಾದ್ ಐಐಐಟಿ ಹೊಂದಿದೆ.

Related posts

Leave a Reply