ದೇಶದಲ್ಲಿ ಹಲವು ಭಾಷೆಗಳಿಗೆ ಸಾವಿನ ಭಯ ಕಾಡುತ್ತಿದೆ. ಅನ್ಯ ಭಾಷೆಗಳ ಆಕ್ರಮಣದಿಂದ ದೇಶದ ಹಲವು ಭಾಷೆಗಳಿಗೆ ಅವನತಿಯ ಆತಂಕ ಸುರುವಾಗಿದೆ. ನಾವು ಅನ್ಯ ಭಾಷೆಯ ಜನರನ್ನು, ಭಾಷೆಯನ್ನು ಸ್ವಾಗತಿಸುವ ಆದರೆ ಇದು ಆರೋಗ್ಯಕರವಾದ ಸ್ವಾಗತ ಆಗಬೇಕು ಹೊರತು ಅನಾರೋಗ್ಯಕರವಾದ ಸ್ವಗತ ಆಗಬಾರದು. ಮಕ್ಕಳಿಗೆ ಕನ್ನಡ ಭಾಷೆಯ ಮೇಲೆ ಅಭಿಮಾನ ಬೆಳೆಸಬೇಕು. ಕನ್ನಡಿಗರಿಗೆ ಕೀಳರಿಮೆ ಬೆಳೆಸಿದರೆ ಕನ್ನಡ ನಾಶ ಆಗುತ್ತದೆ ಎಂದು ಕನ್ನಡ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷ ಎಸ್.ಜಿ.ಸಿದ್ದರಾಮಯ್ಯ ಹೇಳಿದರು.ಅವರು ಸುಬ್ರಹ್ಮಣ್ಯದಲ್ಲಿ ನಡೆದ 22ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳವಕ್ಕೆ ಚಾಲನೆ ನೀಡಿ ಮಾತನಾಡಿದರು.
22ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನಾಧ್ಯಕ್ಷೆ ಎ.ಪಿ. ಮಾಲತಿ ಮಾತನಾಡಿ ಮಕ್ಕಳಲ್ಲಿ ಕನ್ನಡ ಭಾಷಾಭಿಮಾನ ಕುಂಠಿತ ವಾಗುತ್ತಿದೆ. ಇದಕ್ಕೆ ಪೋಷಕರು ನೇರ ಕಾರಣ, ಗ್ರಾಮೀಣ ಪ್ರದೇಶಗಳಲ್ಲಿ ಕನ್ನಡ ಶಾಲೆಗಳಿಗೆ ಬಾಗಿಲು ಹಾಕಲಾಗುತ್ತಿದೆ. ಶಾಲೆಗಳಲ್ಲಿನ ಬೆರಳೆಣಿಕೆಯ ಮಕ್ಕಳು, ಶಿಕ್ಷಕರ ಕೊರತೆ ಮತ್ತು ಹೆತ್ತವರ ಇಂಗ್ಲೀಷ್‌ನ ವ್ಯಾಮೋಹದಿಂದ ಮಕ್ಕಳು ಕನ್ನಡದ ಬಗೆಗೆ ಸಂಪೂರ್ಣ ಅಜ್ಞಾನಿಯಾಗುತ್ತಿದೆ. ಪ್ರತಿ ವರ್ಷ ನಡೆಯುವ ಸಾಹಿತ್ಯ ಸಮ್ಮೇಳನಗಳಲ್ಲಿ ಈ ಬಗ್ಗೆ ಜಾಗೃತಿ ಮೂಡಿಸಿದರೂ ಫಲಿತಾಂಶ ಮಾತ್ರ ಶೂನ್ಯ ಎಂದು ಹೇಳಿದರು.ಪುಸ್ತಕಗಳನ್ನು ಬಿಡುಗಡೆಗೊಳಿಸಿದ ವಿಧಾನ ಪರಿಷತ್ ಸಭಾಪತಿ ಡಿ.ಎಚ್. ಶಂಕರಮೂರ್ತಿ ಮಾತನಾಡಿ ಕನ್ನಡ ಭಾಷೆಯ ಬಗ್ಗೆ ಮೊದಲು ಪೋಷಕರಲ್ಲಿ ಬದಲಾವಣೆ ಅಗತ್ಯ. ಪೋಷಕರಲ್ಲಿ ಕನ್ನಡದ ಬಗ್ಗೆ ಇರುವ ಕೀಳರಿಮೆಯಿಂದ ಕನ್ನಡಕ್ಕೆ ಅವನತಿಯ ಆತಂಕ ಕಾಡುತ್ತಿದೆ. ಕನ್ನಡ ಭಾಷೆಯ ಮೇಲೆ ಕೀಳರಿಮೆ, ದುರಾಭಿಮಾನ ಬೇಡ. ಮಕ್ಕಳಿಗೆ ಆತ್ಮಾಭಿಮಾನ ಬೆಳೆಸಿ ಎಂದು ಕರೆ ನೀಡಿದರು.
ಸಮಾರಂಭದಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಶಾಸಕ ಎಸ್. ಅಂಗಾರ ಚಾಲನೆ ನೀಡಿದರು. ಕುವೆಂಪು ವಿವಿಯ ನಿವೃತ್ತ ಕುಲಪತಿ ಪ್ರೋ. ಕೆ. ಚಿದಾನಂದ ಗೌಡ ಗಣ್ಯರನ್ನು ವಿದ್ವತ್ ಸಂಮಾನ ನೆರವೇರಿಸಿ ಸನ್ಮಾನಿಸಿದರು. ವೇದಿಕೆಯಲ್ಲಿ ನಿಕಟಪೂರ್ವ ಸಮ್ಮೇಳನಾಧ್ಯಕ್ಷ ಹಾವೇರಿ ಜಾನಪದ ವಿವಿ ವಿಶ್ರಾಂತ ಕುಲಪತಿ ಡಾ| ಕೆ. ಚಿನ್ನಪ್ಪ ಗೌಡ, ಕನ್ನಡ ಸಾಹಿತ್ಯ ಪರಿಷತ್ ಮಾಜಿ ಅಧ್ಯಕ್ಷ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಸ್ಥಿತರಿದ್ದರು. ಸಮಾರಂಭಕ್ಕೂ ಮೊದಲು ಕೆ.ಎಸ್.ಎಸ್ ಪದವಿ ಕಾಲೇಜು ಬಳಿಯಿಂದ ಕನ್ನಡ ಭುವನೇಶ್ವರಿಯ ಆಕರ್ಷಕ ಮೆರವಣಿಗೆ ನಡೆಯಿತು. ಮೆರವಣಿಕೆಯಲ್ಲಿ ವಿವಿಧ ಶಾಲಾ ಕಾಲೇಜಿನ ಮಕ್ಕಳು, ಕೇರಳದ ಸಿಂಗರಿ ಮೇಳ, ಕಂಗೀಲು ನೃತ್ಯ, ಡೋಲು ಕುಣಿತ ತಂಡ, ಕಂಸಾಳೆ ನೃತ್ಯ ತಂಡ, ವೀರಾಗಾಸೆ, ನವೀಲು ನೃತ್ಯ, ಭಜನೆ ತಂಡ, ವಿವಿಧ ಆಕಾರದ ಗೊಂಬೆಗಳು, ಯಕ್ಷಗಾನ ಕಲಾತಂಡಗಳು ಮೆರವಣಿಗೆಯ ಮೆರುಗು ಹೆಚ್ಚಿತ್ತು.