Breaking News

ಮನ್‌ದೀಪ್ ಸಿಂಗ್ ಹ್ಯಾಟ್ರಿಕ್ ಗೋಲು, ಭಾರತಕ್ಕೆ ಅಜ್ಲಾನ್ ಷಾ ಹಾಕಿಯಲ್ಲಿ ಜಯ

ತಂಡ ಸಂಕಷ್ಟದಲ್ಲಿದ್ದ ಸಂದರ್ಭದಲ್ಲಿ ಛಲದಿಂದ ಹೋರಾಡಿ ಹ್ಯಾಟ್ರಿಕ್’ ಗೋಲಿನ ಸಾಧನೆ ಮಾಡಿದ ಸ್ಟ್ರೈಕರ್ ಮನದೀಪ್ ಸಿಂಗ್ ಅವರ ಕೆಚ್ಚೆದೆಯ ಆಟದ ಬಲದಿಂದಾಗಿ ಭಾರತ ತಂಡ ಅಜ್ಲಾನ್ ಷಾ ಕಪ್ ಹಾಕಿ ಟೂರ್ನಿಯ ರೌಂಡ್ ರಾಬಿನ್ ಲೀಗ್ ಪಂದ್ಯದಲ್ಲಿ ಜಯದ ಸಿಹಿ ಸವಿಯಿತು.
ಭಾರತ ೪-೩ ಗೋಲುಗಳಿಂದ ವಿಶ್ವ ಕ್ರಮಾಂಕ ಪಟ್ಟಿಯಲ್ಲಿ ತನಗಿಂತಲೂ ಕೆಳಗಿನ ಸ್ಥಾನ ಹೊಂದಿರುವ ಜಪಾನ್ ತಂಡದ ಸವಾಲು ಮೀರಿ ನಿಂತಿತು. ಮಲೇಶಿಯಾದ ಇಪೋದಲ್ಲಿ ಇದರೊಂದಿಗೆ ಪೂರ್ಣ ಪಾಯಿಂಟ್ ಹೆಕ್ಕಿರುವ ತಂಡ ಟೂರ್ನಿಯಲ್ಲಿ ಫೈನಲ್ ಪ್ರವೇಶಿಸುವ ಆಸೆಗೆ ಬಲ ತುಂಬಿ ಕೊಂಡಿದೆ. ಆಡಿರುವ ನಾಲ್ಕು ಪಂದ್ಯ ಗಳಿಂದ ತಂಡ ಏಳು ಪಾಯಿಂಟ್ಸ್ ಸಂಗ್ರಹಿಸಿದೆ. ಮಂಗಳವಾರ ನಡೆದಿದ್ದ ಪಂದ್ಯದಲ್ಲಿ ದಿಟ್ಟ ಆಟವಾಡಿದರೂ ಹಾಲಿ ಚಾಂಪಿ ಯನ್ ಆಸ್ಟ್ರೇಲಿಯಾಕ್ಕೆ ಮಣಿದಿದ್ದ ಭಾರತ ತಂಡ, ಜಪಾನ್ ವಿರುದ್ಧದ ಪೈಪೋಟಿಯಲ್ಲಿ ಶುರುವಿನಿಂದಲೇ ಚುರುಕಿನ ಆಟ ಆಡಿ ಗಮನ ಸೆಳೆಯಿತು. ಚೆಂಡು ಹೆಚ್ಚು ಸಮಯ ತಮ್ಮ ಬಳಿಯೇ ಇರುವಂತೆ ನೋಡಿಕೊಂಡ ಭಾರತದ ಆಟಗಾರರು ಪದೇ ಪದೇ ಜಪಾನ್ ರಕ್ಷಣಾ ಕೋಟೆಯ ಮೇಲೆ ದಾಳಿ ನಡೆಸುವ ತಂತ್ರ ಅನುಸರಿಸಿದರು.
ಎಂಟನೇ ನಿಮಿಷದಲ್ಲಿ ಚೆಂಡಿನೊಂದಿಗೆ ಆವರಣ?ಪ್ರವೇಶಿಸಿದ ಭಾರತದ ಆಟಗಾರನನ್ನು ಜಪಾನ್ನ ಆಟಗಾರ ಬೀಳಿಸಿದರು. ಹೀಗಾಗಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಅವಕಾಶ ಸಿಕ್ಕಿತು. ಈ ಅವಕಾಶವನ್ನು ಡ್ರ್ಯಾಗ್ಫ್ಲಿಕ್ ಪರಿಣತ ಆಟಗಾರ ರೂಪಿಂದರ್ ಪಾಲ್ ಸಿಂಗ್ ಚೆನ್ನಾಗಿ ಬಳಸಿಕೊಂಡರು. ಅವರು ಗುರಿ ಇಟ್ಟು ಕಳುಹಿಸಿದ ಚೆಂಡನ್ನು ತಡೆಯಲು ಜಪಾನ್ ತಂಡದ ಗೋಲ್ ಕೀಪರ್ ಸುಗುರು ಶಿಮ್ಮೊಟ್ಟೊ ಬಲಕ್ಕೆ ಜಿಗಿದರಾದರೂ ಅವರ ಪ್ರಯತ್ನ ಫಲಿಸಲಿಲ್ಲ. ಹೀಗಾಗಿ ಭಾರತ ಗೋಲಿನ ಖಾತೆ ತೆರೆಯಿತು.
ಈ ಖುಷಿ ಹೆಚ್ಚು ಹೊತ್ತು ಉಳಿಯಲು ಜಪಾನ್ನ ಕಜುಮಾ ಮುರಾತ ಅವಕಾಶ ನೀಡಲಿಲ್ಲ. ೧೦ನೇ ನಿಮಿಷದಲ್ಲಿ ಚೆಂಡನ್ನು ಭಾರತದ ಗೋಲು ಪೆಟ್ಟಿಗೆ ಯೊಳಗೆ ಸೇರಿಸಿದ ಅವರು ೧-೧ರ ಸಮಬಲಕ್ಕೆ ಕಾರಣರಾದರು. ೪೨ನೇ ನಿಮಿಷದಲ್ಲಿ ಜಪಾನ್ ಸೊಗಸಾದ ರೀತಿಯಲ್ಲಿ ಡ್ರಿಬಲ್ ಮಾಡುತ್ತಾ ಆವರಣ ಪ್ರವೇಶಿಸಿದ ಹಿಯೆಟಾ ಯೊಶಿಹರಾ ಅವರನ್ನು ತಡೆಯಲು ಭಾರತದ ರಕ್ಷಣಾ ವಿಭಾಗದ ಆಟಗಾರರು ನುಗ್ಗಿದರು. ಇದರಿಂದ ಹಿಯೆಟಾ ಗಲಿಬಿಲಿಗೊಳ್ಳಲಿಲ್ಲ. ಅವರು ಆವರಣದ ಬಲ ತುದಿಯಿಂದ ಮಿಂಚಿನ ಗತಿಯಲ್ಲಿ ಬಾರಿಸಿದ ಚೆಂಡು ಭಾರತದ ಗೋಲ್ ಕೀಪರ್ ಆಕಾಶ್ ಚಿಕ್ಟೆ ಅವರನ್ನು ವಂಚಿಸಿ ಗುರಿ ಸೇರುತ್ತಿದ್ದಂತೆ ಜಪಾನ್ ಪಾಳಯದಲ್ಲಿ ಸಂತಸದ ಹೊನಲು ಹರಿಯಿತು.
೪೫ನೇ ನಿಮಿಷದಲ್ಲಿ ಹರ್ಮನ್ಪ್ರೀತ್ ಸಿಂಗ್ ಚೆಂಡಿನೊಂದಿಗೆ ಜಪಾನ್ ಆವರಣ ಪ್ರವೇಶಿಸಿದರು. ಈ ವೇಳೆ ಎದುರಾಳಿ ತಂಡದ ರಕ್ಷಣಾ ವಿಭಾಗದ ಆಟಗಾರರು ಅವರತ್ತ ನುಗ್ಗಿದರು. ಇದನ್ನು ಗಮನಿಸಿದ ಹರ್ಮನ್ಪ್ರೀತ್ ಚೆಂಡನ್ನು ಮನದೀಪ್ ಅವರತ್ತ ತಳ್ಳಿದರು. ಇದನ್ನು ತಡೆದ ಮನದೀಪ್ ಕಣ್ಣೆವೆ ಮುಚ್ಚಿ ತೆರೆಯುವಷ್ಟರಲ್ಲಿ ಗುರಿ ಮುಟ್ಟಿಸಿದರು. ಹೀಗಾಗಿ ತಂಡ ೨-೨ರಲ್ಲಿ ಸಮಬಲ ಮಾಡಿಕೊಂಡಿತು. ಮೊದಲರ್ಧದ ಆಟ ಮುಗಿಯಲು ಕೆಲವೇ ಸೆಕೆಂಡುಗಳು ಬಾಕಿ ಇದ್ದಾಗ ಗೆನ್ಕಿ ಮಿಟಾನಿ ಗೋಲು ದಾಖಲಿಸಿ ಜಪಾನ್ ತಂಡದ ಖುಷಿ ಹೆಚ್ಚಿಸಿದರು.
೨-೩ರ ಹಿನ್ನಡೆಯೊಂದಿಗೆ ವಿರಾಮಕ್ಕೆ ಹೋದ ಭಾರತ ತಂಡ ದ್ವಿತೀಯಾರ್ಧ ದಲ್ಲಿ ಭಿನ್ನ ರಣತಂತ್ರ ಹೆಣೆದು ಅಂಗಳಕ್ಕಿಳಿಯಿತು. ೫೧ನೇ ನಿಮಿಷದಲ್ಲಿ ೩೦ ಗಜ ದೂರದಿಂದ ಸರ್ದಾರ್ ಸಿಂಗ್ ಬಾರಿಸಿದ ಚೆಂಡನ್ನು ಜಪಾನ್ ಗೋಲ್ಕೀಪರ್ ಶಿಮ್ಮೊಟ್ಟೊ ತಡೆದರು. ಅವರ ಪ್ಯಾಡ್ಗೆ ತಾಗಿ ತಮ್ಮತ್ತ ಬಂದ ಚೆಂಡನ್ನು ಗೋಲುಪೆಟ್ಟಿಗೆಯ ಸನಿಹದಲ್ಲೇ ಇದ್ದ ಮನದೀಪ್ ಗುರಿ ತಲುಪಿಸಲು ತಡ ಮಾಡಲಿಲ್ಲ. ಹೀಗಾಗಿ ತಂಡ ೩-೩ರಲ್ಲಿ ಸಮಬಲ ಮಾಡಿ ಕೊಂಡಿತು. ಆ ನಂತರದ ಅವಧಿಯಲ್ಲಿ ಭಾರತದ ಆಟ ಇನ್ನಷ್ಟು ರಂಗು ಪಡೆದು ಕೊಂಡಿತು. ೫೮ನೇ ನಿಮಿಷದಲ್ಲಿ ರೂಪಿಂದರ್ ಪಾಲ್ ಸಿಂಗ್ ನೀಡಿದ ಪಾಸ್ನಲ್ಲಿ ಚೆಂಡನ್ನು ನಿಯಂತ್ರಣಕ್ಕೆ ಪಡೆದ ಮನದೀಪ್ ಅದನ್ನು ಗುರಿ ಮುಟ್ಟಿ ಸುತ್ತಿದ್ದಂತೆ ಭಾರತದ ಆಟಗಾರರು ಸಂಭ್ರಮದ ಹೊಳೆಯಲ್ಲಿ ಮಿಂದೆದ್ದರು. ಶುಕ್ರವಾರ ನಡೆಯುವ ಪಂದ್ಯದಲ್ಲಿ ಭಾರತ ತಂಡ ಆತಿಥೇಯ ಮಲೇಷ್ಯಾ ವಿರುದ್ಧ ಸೆಣಸಲಿದೆ.

Related posts

Leave a Reply