Breaking News

ಮಾತು ತಪ್ಪಿದ ಪಡುಬಿದ್ರಿ ಸುಜ್ಲಾನ್ ಕಂಪೆನಿ, ಕೆಲಸ ಕಳೆದುಕೊಂಡು ಬೀದಿಗೆ ಬಿದ್ದ ಕಾರ್ಮಿಕರು


ಕಾಪು ಶಾಸಕರ ಸಹಿತ ಕೆಲ ರಾಜಕೀಯ ಮುಖಂಡರು ಹಾಗೂ ಸಂಘಟನೆಗಳ ಸಮಕ್ಷಮದಲ್ಲಿ ನಡೆದ ಸಭೆಯಲ್ಲಿ ನಿರ್ಣಯಿಸಿದಂತೆ, ಎರಡು ತಿಂಗಳೋಳಗೆ ಮರಳಿ ಕೆಲಸಕ್ಕೆ ಸೇರಿಸುವುದಾಗಿ ಏಕಾಏಕಿ ೭೦೦ಕ್ಕೂ ಅಧಿಕ ಕಾರ್ಮಿಕರನ್ನು ಕಾರಣ ಹೇಳದೆ ಒಂದೇ ದಿನದಲ್ಲಿ ಕೆಲಸದಿಂದ ಕಿತ್ತು ಹಾಕಿದ ಸುಜ್ಲಾನ್ ಗುತ್ತಿಗೆ ಕಂಪನಿಗಳು, ಇದೀಗ ಎರಡು ತಿಂಗಳು ಕಳೆದರೂ ಕೇವಲ ಪ್ರತಿಭಟನೆಯ ಮುಂಚೂಣಿಯಲ್ಲಿದ್ದ ೧೮೦ ಯುವಕರನ್ನು ಸೇರಿಸಿಕೊಂಡಿದ್ದಲ್ಲದೆ ಉಳಿದ ಕಾರ್ಮಿಕರನ್ನು ಬೀದಿಗೆ ತಳ್ಳಿದೆ ಎಂಬುದಾಗಿ ಕೆಲಸ ಕಳೆದುಕೊಂಡ ಕಾರ್ಮಿಕರು ಬೇಸರ ವ್ಯಕ್ತ ಪಡಿಸಿದ್ದಾರೆ.
ದಲಿತ ಮುಖಂಡ ಶೇಖರ್ ಹೆಜಮಾಡಿ ನೇತೃತ್ವದಲ್ಲಿ ನಂದಿಕೂರು ರಾಮ ದೇವಸ್ಥಾನದಲ್ಲಿ ನಡೆದ ಸಂತ್ರಸ್ಥ ಕಾರ್ಮಿಕರ ಸಭೆಯಲ್ಲಿ ಮಹಿಳಾ ಕಾರ್ಮಿಕರು ತಮ್ಮ ನೋವನ್ನು ತೋಡಿಕೊಂಡರು. ಸುಜ್ಲಾನ್ ಗುತ್ತಿಗೆ ಕಂಪನಿಗಳಾದ ಯೂನಿಟೆಕ್ ಹಾಗೂ ಎಸ್.ಎಸ್.ಪಿ.ಎಲ್. ಏಕಾಏಕಿಯಾಗಿ ಯಾವುದೇ ಮುನ್ನುಸೂಚನೆ ನೀಡದೆ ನಾವು ತಯಾರಿಸಿದ ಬ್ಲೇಡ್‌ಗಳ ಮಾರಾಟ ಕುಂಟಿತವಾಗಿದೆ ಕಂಪನಿ ನಷ್ಟದಲ್ಲಿದೆ ಎಂಬುದಾಗಿ ಕಾರ್ಮಿಕರಾದ ನಮ್ಮನ್ನು ಕೆಲಸದಿಂದ ವಜಾಮಾಡಿದ್ದರು. ತಕ್ಷಣ ನಾವು ಕಂಪನಿಯ ವಿರುದ್ಧ ಪ್ರತಿಭಟನೆ ಆರಂಭಿಸಿದಾಗ ವಿವಿಧ ಸಂಘಟನೆಗಳು ಸಹಿತ ರಾಜಕೀಯ ಮುಖಂಡರು ಬಾಗಿಯಾಗಿ ನಮ್ಮ ಪ್ರತಿಭಟನೆಗೆ ಸಾತ್ ನೀಡಿದ್ದರಿಂದ ಸ್ಥಳಕ್ಕೆ ಜಿಲ್ಲಾಧಿಕಾರಿಯವರ ಪ್ರತಿನಿಧಿಯಾಗಿ ಉಡುಪಿ ದಂಡಾಧಿಕಾರಿ ಆಗಮಿಸಿ, ಕಾಪು ಶಾಸಕರೊಂದಿಗಿನ ಸುದೀರ್ಘ ಮಾತುಕತೆಯ ಬಳಿಕ ಮುಂದಿನ ಎರಡು ತಿಂಗಳ ಬಳಿಕ ಮತ್ತೆ ಕೆಲಸಕ್ಕೆ ಸೇರಿಸಿಕೊಳ್ಳುವ ಭರವಸೆಯೊಂದಿಗೆ, ರಜಾ ದಿನಗಳ ಎರಡು ತಿಂಗಳ ಅರ್ಧ ಸಂಬಳ ನೀಡುವುದಾಗಿ ಭರವಸೆ ನೀಡಿ ಮುಚ್ಚಳಿಕೆ ಬರೆಯಿಸಿ, ಅದಕ್ಕೆ ಕಂಪನಿಯ ಅಧಿಕಾರಿಗಳು ಸಹಿತ ಜನಪ್ರತಿನಿಧಿಗಳು ಸಂಘಟನಾ ಮುಖ್ಯಸ್ಥರು ಸಹಿ ಹಾಕಿಸಿ ಪ್ರತಿಯನ್ನು ಪ್ರತಿಭಟನಾಗಾರರಿಗೆ ನೀಡಿದ್ದರು.
ಆದರೆ ಇದೀಗ ಎರಡು ತಿಂಗಳು ಕಳೆದಿದ್ದು ಪ್ರತಿಭಟನೆ ನಡೆಸುತ್ತಾರೆ ಎಂಬ ಕಾರ್ಮಿಕರಲ್ಲಿನ ೧೮೦ ಮಂದಿ ಯುವಕರನ್ನು ಕರೆಯಿಸಿ ಅವರಿಗೆ ಉದ್ಯೋಗ ನೀಡುವ ಮೂಲಕ ಹೋರಾಟವನ್ನು ಹತ್ತಿಕ್ಕುವ ಕಾರ್ಯವನ್ನು ಕಂಪನಿಯ ಪ್ರಮುಖರು ಮಾಡಿದ್ದಾರೆ. ಇದೀಗ ನಾವು ಕಂಪನಿ ಅಧಿಕಾರಿಗಳ ಭರವಸೆಯ ಮಾತನ್ನು ನಂಬಿ ಉದ್ಯೋಗಕ್ಕಾಗಿ ಕಾಯುತ್ತಿದ್ದರೂ ಕಂಪನಿ ಸ್ಪಂದಿಸುತ್ತಿಲ್ಲ. ನಮ್ಮ ಕುಟುಂಬದ ಜೀವನ ಸಾಗಿಸುವುದಕ್ಕಾಗಿ ಉದ್ಯೋಗ ಅವಶ್ಯಕವಾಗಿದ್ದು ಯಾವ ಮಟ್ಟದ ಹೋರಾಟಕ್ಕೂ ನಾವು ಸಿದ್ಧ ಎಂಬುದಾಗಿ ಕಾರ್ಮಿಕರು ತಿಳಿಸಿದ್ದಾರೆ. ಕಾರ್ಮಿಕರ ಯಾವುದೇ ಹೋರಾಟಕ್ಕೆ ವಿವಿಧ ಸಂಘಟನೆ ರಾಜಕೀಯ ಪಕ್ಷಗಳೊಂದಿಗೆ ದಲಿತ ಸಂಘಟನೆಗಳು ಕೂಡಿಕೊಂಡು ಹೋರಾಟವನ್ನು ಬೆಂಬಲಿಸುವುದಾಗಿ ದಲಿತ ಮುಖಂಡ ಶೇಖರ್ ಹೆಜಮಾಡಿ ಹೇಳಿದ್ದಾರೆ.

Related posts

Leave a Reply