Breaking News

ಸುರಿದ ಜೋರು ಮಳೆ, ಕೃತಕ ನೆರೆಯಿಂದ ಮನೆ, ಮಸೀದಿಗಳಿಗೆ ನುಗ್ಗಿದ ಮಳೆ ನೀರು

ಶನಿವಾರ ರಾತ್ರಿಯಿಂದ ಸುರಿದ ಭಾರಿ ಮಳೆಗೆ ಸಾಸ್ತಾನದ ಕೋಡಿ ರಸ್ತೆಯಲ್ಲಿ ಹಲವಾರು ಮನೆಗಳಿಗೆ ನೀರು ನುಗ್ಗಿ ರಾದ್ದಾಂತವಾಗಿತ್ತು. ಹಬ್ಬದ ಸಡಗರದಲ್ಲಿದ್ದ ಮುಸ್ಲಿಂ ಭಾಂದವರಿಗೆ ನೆರೆ ಹಬ್ಬದ ಸಡಗರಕ್ಕೆ ತಣ್ಣಿರೆರಚ್ಚಿತ್ತು.ರಂಜಾನ್ ಮುಸ್ಲಿಂರ ವಿಶಿಷ್ಟ ಹಬ್ಬ, ರವಿವಾರ ಎಲ್ಲೆಡೆ ರಂಜಾನ್ ಹಬ್ಬದ ಸಡಗರವಾದ್ರೆ ಇಲ್ಲಿ ಮಾತ್ರ ಹಬ್ಬದ ಸಡಗರ ಕಳೆಗುಂದಿತ್ತು. ಶನಿವಾರ ರಾತ್ರಿಯಿಂದ ಸುರಿದ ಭಾರೀ ಮಳೆಯಿಂದಾಗಿ ಸಾಲಿಗ್ರಾಮ ಪಟ್ಟಣ ಪಂಚಾಯತ್ ವ್ಯಾಪ್ತಿಯ ಸಾಸ್ತಾನ ಕೋಡಿ ರಸ್ತೆಯ ಮಸೀದಿಯ ಸುತ್ತಮುತ್ತಲಿನ ಪ್ರದೇಶಗಳು ಸಂಪೂರ್ಣ ಜಲಾವೃತಗೊಂಡು ಜನಜೀವನ ಅಸ್ಥವ್ಯಸ್ತಗೊಂಡು ಹತ್ತಕ್ಕೂ ಹೆಚ್ಚು ಮನೆಗಳಿಗೆ ನೆರೆ ನೀರು ನುಗ್ಗಿದ ಘಟನೆ ನಡೆದಿದೆ. ಈ ಪ್ರದೇಶದಲ್ಲಿ ಸಂಪೂರ್ಣ ಮುಸ್ಲೀಂ ಸಮುದಾಯದವರು ವಾಸವಾಗಿದ್ದು ಹಬ್ಬದ ದಿನ ಮನೆಗೆ ನುಗ್ಗಿದ ನೀರನ್ನು ಹೊರಹಾಕುವ ಪರಿಸ್ಥಿತಿ ಬಂದೊದಗಿದೆ. ಬಡ ಕುಟುಂಬವೊಂದರ ಆಹಾರ ಧಾನ್ಯಗಳು ನೀರಿನಲ್ಲಿ ಕೊಚ್ಚಿಹೊಗಿದ್ದು ಹಲವಾರು ಮನೆಗಳ ವಿದ್ಯುತ್ ಉಪಕರಣಗಳಿಗೂ ಹಾನಿಯಾಗಿವೆ.
ಈ ಘಟನೆಗೆ ಸ್ಥಳೀಯ ವ್ಯಕ್ತಿಯೊಬ್ಬರು ಮನೆ ಕಟ್ಟುವ ಸಂದರ್ಭ ತಮ್ಮ ಜಾಗವನ್ನು ಅಗತ್ಯಕ್ಕಿಂತ ಹೆಚ್ಚಿಗೆ ಏರಿಸಿದ್ದು ಅಲ್ಲದೆ ಸ್ವಾಭಾವಿಕ ನೀರಿನ ಹರಿವಿನ ತೋಡನ್ನು ಮುಚ್ಚಿದ್ದು ಘಟನೆಗೆ ಕಾರಣವೆನ್ನಲಾಗಿದ್ದು, ಈ ಪ್ರದೇಶಕ್ಕೆ ಸಾಸ್ತಾನ ಪೇಟೆ ಸೇರಿದಂತೆ ಹಲವು ಪ್ರದೇಶಗಳ ನೀರು ಈ ತೋಡಿನ ಮೂಲಕವೇ ಹರಿದು ಹೋಗುತ್ತದೆ. ಆದರೆ ಈ ತೋಡು ಮುಚ್ಚಿದ್ದು ನೀರಿನ ಹರಿವಿಗೆ ತೊಡಕನ್ನು ಉಂಟು ಮಾಡಿದ್ದು ಕಳೆದ ಮೂರ‍್ನಾಲ್ಕು ವರ್ಷಗಳಿಂದ, ಇಲ್ಲಿ ಕೃತಕ ನೆರೆ ಸೃಷ್ಟಿಗೆ ಕಾರಣವಾಗಿದೆ.ನೆರೆ ಪೀಡಿತ ಪ್ರದೇಶದಲ್ಲಿ ಮುಸ್ಲಿಂ ಸಮುದಾಯ ಹೆಚ್ಚಿನ ಸಂಖ್ಯೆಯಲ್ಲಿ ವಾಸ್ತವ್ಯವಿದ್ದು, ಇಲ್ಲಿನ ನಿವಾಸಿಗಳಾದ ಝಾಕಿರ್ ಹುಸೇನ್, ಸೈಯದ್, ರೆಹಮನ್, ರೇಷ್ಮಾ, ಅಬ್ಬುಸಾಹೇಬ್, ಮಹಮ್ಮದ್, ಉಮರ್, ಷಾಬಾ ಸೇರಿದಂತೆ ಹತ್ತಕ್ಕೂ ಹೆಚ್ಚು ಮನೆಗಳಿಗೆ ನೀರು ನುಗ್ಗಿದೆ. ಬೆಳಿಗ್ಗೆಯಿಂದ ಮನೆ ಸುತ್ತ ನಿಂತಿದ್ದ ನೀರನ್ನು ಹೊರಹಾಕುವುದರಲ್ಲಿ ಇಂದಿನ ದಿನ ಕಳೆದು ಹೋಗಿದ್ದು, ಇನ್ನು ಹಬ್ಬ ಆಚರಿಸುವುದು ಎಲ್ಲಿ ಎಂದು ಸಂತ್ರಸ್ಥರು ತಮ್ಮ ದುಃಖವನ್ನು ಮಾಧ್ಯಮದೊಂದಿಗೆ ತೋಡಿಕೊಂಡರು.
ನೆರೆ ಪೀಡಿತ ಪ್ರದೇಶಕ್ಕೆ ವರದಿಗೆಂದು ತೆರಳಿದ ನಮ್ಮ ವರದಿಗಾರರು ಇಲ್ಲಿನ ಜನರ ಗೋಳನ್ನು ನೋಡಿ ತಕ್ಷಣ ದೂರವಾಣಿ ಮುಖಾಂತರ ಸಾಲಿಗ್ರಾಮ ಪ.ಪಂ ಅಧ್ಯಕ್ಷರಿಗೆ ಸಮಸ್ಯೆಯ ಮನವರಿಕೆ ಮಾಡಿದರು. ತಕ್ಷಣ ಸಮಸ್ಯೆಗೆ ಸ್ಪಂದಿಸಿದ ಸಾಲಿಗ್ರಾಮ ಪ.ಪಂ ಅಧ್ಯಕ್ಷೆ ರತ್ನಾ ನಾಗಾರಾಜ್ ಮುಖ್ಯಾಧಿಕಾರಿ ಶ್ರೀಪಾದ್ ಪುರೋಹಿತ್, ವಾರ್ಡ್ ಸದಸ್ಯರಾದ ಕುಸುಮ ಬಸವ ಪೂಜಾರಿ, ಸದಸ್ಯ ಶಿವ ಪೂಜಾರಿ ಭೇಟಿ ನೀಡಿ ನೆರೆ ಪೀಡಿತ ಮನೆಗಳ ದುರವಸ್ಥೆಯನ್ನು ಕಂಡು ತಕ್ಷಣ ಸಮಸ್ಯೆಗೆ ಪರಿಹಾರ ನೀಡುವ ಭರವಸೆ ನೀಡಿದರು. ನಂತರ ನೀರನ್ನು ತಡೆ ಹಿಡಿದ ಸ್ಥಳಕ್ಕೆ ಭೇಟಿ ನೀಡಿ ಸ್ಥಳ ಪರಿಶೀಲನೆ ನಡೆಸಿದರು. ಈ ಸಂದರ್ಭ ನೀರನ್ನು ತಡೆ ಹಿಡಿದಿದ್ದಾರೆ ಎಂದು ಆರೋಪಿಸಲಾದ ಮನೆ ಮಾಲೀಕನ ಮತ್ತು ಸಂತ್ರಸ್ಥರ ನಡುವೆ ಭಾರಿ ವಾಕ್ಸಮರ ನಡೆಯಿತು. ಈ ಸಂದರ್ಭ ಕೆಲ ಕಾಲ ಉಧ್ವೀಘ್ನ ವಾತಾವರಣ ಉಂಟಾಯಿತು.ಕೂಡಲೇ ಮುಖ್ಯಾಧಿಕಾರಿಗಳು ಮತ್ತು ಅಧ್ಯಕ್ಷರು ಸ್ಥಳೀಯರನ್ನು ಸಮಾಧಾನಿಸುವ ಪ್ರಯತ್ನ ನಡೆಸಿದರು.
ಈ ಸಂದರ್ಭ ಅಧ್ಯಕ್ಷೆ ರತ್ನಾ ನಾಗಾರಾಜ್, ನೀರಿನ ಹರಿವಿನ ಸ್ಥಳ ಎಲ್ಲಿದೆ ಎಂದು ಸೂಕ್ತವಾಗಿ ಪರಿಶೀಲನೆ ನಡೆಸಿ ಸೋಮವಾರ ಇಲ್ಲಿನ ಸಮಸ್ಯೆಗೆ ತಕ್ಷಣದ ಪರಿಹಾರ ನೀಡಲಾಗುತ್ತದೆ ಎಂದು ಸ್ಥಳೀಯರಿಗೆ ಭರವಸೆ ನೀಡಿದರು. ನಾಳೆಯೊಳಗೆ ಸಮಸ್ಯೆ ಪರಿಹಾರವಾಗದಿದ್ದಲ್ಲಿ ಮಂಗಳವಾರ ಪ.ಪಂಚಾಯತ್‌ಗೆ ಮುತ್ತಿಗೆ ಹಾಕಿ ಉಗ್ರ ಹೋರಾಟ ನಡೆಸುವುದಾಗಿ ಸ್ಥಳೀಯರು ಎಚ್ಚರಿಕೆ ನೀಡಿದರು.

Related posts

Leave a Reply