Header Ads
Header Ads
Breaking News

ಕೃಷಿ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ವಿಸ್ತರಿಸುವ ಕಾರ್ಯ : ಕೃಷಿ ಕಾಯಕದಲ್ಲಿ ತೊಡಗಿಸಿಕೊಳ್ಳಲು ಮುಂದಾದ ಶ್ರದ್ಧಾಕೇಂದ್ರ

ವಿಟ್ಲ: ಪ್ರಸ್ತುತ ಕಾಲಘಟ್ಟದಲ್ಲಿ ಆಧುನಿಕ ತಂತ್ರಜ್ಞಾನದಿಂದ ಯುವ ಜನರು ಕೃಷಿ ಬೇಸಾಯದಿಂದ ದೂರ ಹೋಗುತ್ತಿದ್ದಾರೆ. ಕೃಷಿ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ವಿಸ್ತರಿಸುವ ಮೂಲಕ ಯುವ ಜನರು ಕೃಷಿ ಬೇಸಾಯದಲ್ಲಿ ತೊಡಗಿಸಿಕೊಳ್ಳಲು ಹಾಗೂ 200ಕ್ಕಿಂತಲೂ ಅಧಿಕ ಕುಟುಂಬದ ಎಲ್ಲಾ ಸದಸ್ಯರನ್ನು ಒಗ್ಗೂಡಿಸುವ ಕೆಲಸಕ್ಕೆ ವಿಟ್ಲ ಸಮೀಪದ ಧಾರ್ಮಿಕ ಶ್ರದ್ಧಾಕೇಂದ್ರ ಮುಂದಾಗಿದೆ. ಈ ಬಗ್ಗೆ ಒಂದು ವಿಶೇಷ ಸ್ಟೋರಿ ಇಲ್ಲಿದೆ.

ಗದ್ದೆಯಲ್ಲಿ ನೇಜಿ ನೆಡುತ್ತಿರುವ ಕೈಸ್ತ ಬಾಂಧವರು, ಗದ್ದೆಗೆ ಇಳಿದು ಅವರಿಗೆ ಸಾಥ್ ನೀಡುತ್ತಿರುವ ಧರ್ಮಗಳು, ಗದ್ದೆಯಲ್ಲಿ ಕೆಲಸ ಮಾಡಿದವರಿಗೆ ಚರ್ಚ್ ಸಮೀಪ ಅಡುಗೆ ಮಾಡುತ್ತಿರುವ ಮಹಿಳೆಯರು. ಎಲ್ಲರೂ ಜತೆಗೂಡಿ ಸಂಭ್ರವಿಸಿದ್ದು, ಭಕ್ತರ ನಡುವೆ ಹಬ್ಬದ ವಾತಾವರಣ ನೆಲೆ ಮಾಡಿದೆ. ಹೌದು ಇದು ಕರೋಪಾಡಿ ಗ್ರಾಮದ ವಿಜಯಡ್ಕ ಸಂತ ಲಾರೆನ್ಸ್ ಚರ್ಚ್‌ನಲ್ಲಿ ಕಂಡು ಬಂದ ದೃಶ್ಯಗಳು.

ಬಂಟ್ವಾಳ ತಾಲ್ಲೂಕಿನ ಬರಿಮಾರ್ ಚರ್ಚ್‌ನ ಧರ್ಮಗುರುಯೊಬ್ಬರು ಪಪ್ಪಾಯಿ, ಸೇರಿದಂತೆ ಇನ್ನಿತರ ಕೃಷಿಗಳನ್ನು ಬೆಳೆಸಿ ಮಾದರಿಯಾಗಿದ್ದರು. ಇದೀಗ ವಿಟ್ಲ ಸಮೀಪದ ಕರೋಪಾಡಿ ಗ್ರಾಮದ ವಿಜಯಡ್ಕ ಸಂತ ಲಾರೆನ್ಸ್ ಚರ್ಚ್‌ನಲ್ಲಿ ಚರ್ಚ್ ವ್ಯಾಪ್ತಿಯ 200ಕ್ಕಿಂತಲೂ ಅಧಿಕ ಕುಟುಂಬಗಳ ಭಕ್ತರು ನೇಜಿ ನಾಟಿ ಬೇಸಾಯದತ್ತ ಗಮನ ಕೊಟ್ಟಿದೆ. ವಿಜಯಡ್ಕ ಸಂತ ಲಾರೆನ್ಸ್ ಚರ್ಚ್ ವ್ಯಾಪ್ತಿಯಲ್ಲಿ 200ಕ್ಕಿಂತಲೂ ಅಧಿಕ ಕುಟುಂಬಗಳು ವಾಸ ಮಾಡುತ್ತಿದೆ. ಈ ಕುಟುಂಬ ಬಹುತೇಕ ಮಂದಿ ಮಂಗಳೂರು ಸೇರಿದಂತೆ ಮೊದಲಾದ ಕಡೆಗಳಲ್ಲಿ ಉದ್ಯೋಗ, ವ್ಯಾಪಾರಗಳಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾರೆ. ಅವರೆಲ್ಲ ಒಂದು ದಿನದ ಮಟ್ಟಿಗೆ ತಮ್ಮ ವೃತ್ತಿಗೆ ಬಿಡುವು ಕೊಟ್ಟು ಚರ್ಚ್‌ನಲ್ಲಿ ನೇಜಿ ನಾಟಿಗೆ ಕೈ ಜೋಡಿಸಿದ್ದಾರೆ. ಚರ್ಚ್‌ನ ಧರ್ಮಗುರುಗಳು ಭಕ್ತರ ಜತೆಯಲ್ಲಿಯೇ ಗದ್ದೆಗೆ ಇಳಿದು ಕೆಲಸ ಮಾಡುತ್ತಿರುವುದು ಮತ್ತೊಂದು ವಿಶೇಷತೆಯಾಗಿದೆ.

ಚರ್ಚ್‌ನ ಧರ್ಮಗುರು ಎಡ್ವೀನ್ ಅವರ ಮಾರ್ಗದರ್ಶನದಲ್ಲಿ 150ಕ್ಕಿಂತಲೂ ಹೆಚ್ಚಿನ ಯುವಕರು, ಮಹಿಳೆಯರು, ಹಿರಿಯರು, ಮಕ್ಕಳು, ವಿದ್ಯಾರ್ಥಿಗಳು ಚರ್ಚ್‌ಗೆ ಸಂಬಂಧಿಸಿ ಗದ್ದೆಯಲ್ಲಿ ನೇಜಿ ನಾಟಿ ಮಾಡುವ ಮೂಲಕ ಕೃಷಿ ಸಂಸ್ಕೃತಿಯನ್ನು ಉಳಿಸಲು ಪಣತೊಟ್ಟಿದ್ದಾರೆ. ಚರ್ಚ್‌ಗೆ ಸಂಬಂಧಿಸಿದ ಎಕರೆಯಷ್ಟು ಇರುವ ಐದು ಗದ್ದೆಯಲ್ಲಿ ನೇಜಿ ನಾಟಿ ಮಾಡಿದ್ದಾರೆ. ಬೆಳಿಗ್ಗೆ 8 ಗಂಟೆಯಿಂದ ಮಧ್ಯಾಹ್ನ 1ಗಂಟೆಗೆ ವರೆಗೆ ಗದ್ದೆಯಲ್ಲಿ ಪಾರ್‍ದಣ ಹಾಡುತ್ತಾ ತಮ್ಮ ಕೆಲಸವನ್ನು ಮಾಡುತ್ತಿದ್ದಾರೆ. ಈ ಚರ್ಚ್‌ನಲ್ಲಿ ಕಳೆದ ಆರು ವರ್ಷದಿಂದ ಇದೇ ರೀತಿಯ ಬೇಸಾಯ ಮಾಡಲಾಗುತ್ತಿದೆ. ಇದರಿಂದ ಉತ್ಪತ್ತಿಯಾಗುವ ಅಕ್ಕಿಯನ್ನು ಚರ್ಚ್‌ನ ಕಾರ್ಯಕ್ರಮದ ವೇಳೆ ಉಪಯೋಗಕ್ಕೆ ಬಳಸಲಾಗುತ್ತಿದೆ.

ಚರ್ಚ್‌ನ ಆವರಣದಲ್ಲಿ ನೇಜಿಯನ್ನು ಮೊಳಕೆ ಬರಿಸಿ ಬಳಿಕ ಅಲ್ಲಿಂದ ನೇಜಿಯನ್ನು ಪಕ್ಕದ ಗದ್ದೆಗೆ ತಮ್ಮದೇ ವಾಹನದಲ್ಲಿ ಕೊಂಡೊಯ್ಯುತ್ತಾರೆ. ಅಲ್ಲಿ ಜತೆಯಾಗಿ ಹಾಡಿ, ಕುಡಿದು ಜತೆಯಾಗಿ ತಮ್ಮ ಸೇವೆಯನ್ನು ಮಾಡುತ್ತಿದ್ದಾರೆ. 150ಕ್ಕಿಂತಲೂ ಅಧಿಕ ಮಂದಿಗೆ ಸ್ವತಃ ತಾವೇ ಬೆಳಗ್ಗಿನ ಹಾಗೂ ಮಧ್ಯಾಹ್ನ ಊಟಕ್ಕೆ ಚರ್ಚ್‌ನಲ್ಲಿಯೇ ಅಡುಗೆ ಮಾಡಿ ಬಳಸುತ್ತಾರೆ. ಇವರು ಕೇವಲ ನೇಜಿ ನೆಟ್ಟು ಹೋಗುತ್ತಿಲ್ಲ. ಬಳಿಕ ಇನ್ನೊಂದು ದಿನ ತಾವು ನೆಟ್ಟ ನೇಜಿಯನ್ನು ಕೊಯ್ದು ಬಳಿಕ ಅದನ್ನು ಒಣಗಿಸಿ ಭತ್ತವನ್ನು ಪ್ರತ್ಯೇಕ ಮಾಡಿ ಪೇಟೆಗೆ ಕೊಂಡೊಯ್ಯುತ್ತಾರೆ. ನೇಜಿಯ ಬೈಹುಲ್ಲನ್ನು ಚರ್ಚ್‌ನ ಸಾಕು ದನಗಳಿಗೆ ಹಾಗೂ ಸ್ಥಳೀಯರಿಗೆ ನೀಡುತ್ತಾರೆ.

ಆಧುನಿಕ ತಂತ್ರಜ್ಞಾನದ ಯುಗದಲ್ಲಿ ಯುವಜನತೆ ಉದ್ಯೋಗ-ವ್ಯಾಪಾರ ಎಂದು ಹೇಳಿ ಬ್ಯುಸಿಯಾಗುತ್ತಾ ಪೇಟೆ ಸೇರುತ್ತಿದ್ದಾರೆ. ಅವರಿಗೆ ಹಳ್ಳಿಯ ಆಚಾರ-ವಿಚಾರಗಳ ಬಗ್ಗೆ ಮಾಹಿತಿಯೇ ಇರುವುದಿಲ್ಲ. ಇಂತಹ ಸನ್ನಿವೇಶದಲ್ಲಿ ಚರ್ಚ್ ವ್ಯಾಪ್ತಿಯ ಎಲ್ಲ ಕುಟುಂಬದ ಸದಸ್ಯರನ್ನು ಒಟ್ಟುಗೂಡಿಸಿ ಅವರಲ್ಲಿಯೂ ಕೃಷಿ ಸಂಸ್ಕೃತಿಯ ಬಗ್ಗೆ ಅರಿವು ಮೂಡಿಸುವ ಕಾರ್ಯ ಶ್ಲಾಘನೀಯವಾಗಿದೆ.

Related posts

Leave a Reply

Your email address will not be published. Required fields are marked *