Header Ads
Breaking News

ಲಾಕ್‌ ಡೌನ್ ಸಮಯದಲ್ಲಿ ಕೃಷಿಯನ್ನೇ ವೃತ್ತಿಯನ್ನಾಗಿಸಿಕೊಂಡ ವಿಶ್ವನಾಥ್ ಪೂಜಾರಿ

ಬಂಟ್ವಾಳ: ಮನೆ ಪಕ್ಕ ಹಾಗೂ ಹಿಂಭಾಗ ಮಲ್ಲಿಗೆ ಗಿಡದ ಸಾಲು, ಮನೆಯಂಗಳದಲ್ಲಿ ತೊಂಡೆ ಗಿಡದ ಚಪ್ಪರ, ಚಪ್ಪರದಡಿಯಲ್ಲಿ ನಾಟಿ ಕೋಳಿ ಸಾಕಣಿಕೆ. ಎಡ ಪಾರ್ಶದಲ್ಲಿ ಅಡಿಕೆ ತೋಟ, ಒಂದಷ್ಟು ತರಕಾರಿ ಬೆಳೆ, ಮನೆಯಿಂದ ಕೂಗಳತೆಯ ದೂರದಲ್ಲಿ ಮೀನು ಸಾಕಾಣಿಕೆ ಕೆರೆಗಳು…ತಾಲೂಕಿನ ಸರಪಾಡಿ ಗ್ರಾಮದ ಬೀಯಪಾದೆ ಸಮೀಪದ ಪಕ್ಕಿಬೆಟ್ಟು ನಿವಾಸಿ ವಿಶ್ವನಾಥ ಬಿ. ಪೂಜಾರಿ ಅವರ ಬಹು ವಿಧದ ಕೃಷಿಯ ನೋಟವಿದು. ಕೃಷಿಯನ್ನೇ ತನ್ನ ಪೂರ್ಣಾವಧಿ ವೃತ್ತಿಯನ್ನಾಗಿ ಅವಲಂಬಿಸಿರುವ ವಿಶ್ವನಾಥ ಪೂಜಾರಿ ದಂಪತಿಯ ಯಶೋಗಾಥೆ ಇಲ್ಲಿದೆ.

ಮುಂಬೈಯಲ್ಲಿ ಹೊಟೇಲ್ ವೃತ್ತಿಯಲ್ಲಿದ್ದ ವಿಶ್ವನಾಥ ಪೂಜಾರಿಯವರು ಕರೋನಾ ಲಾಕ್‍ಡೌನ್‍ನಿಂದಾಗಿ 5 ತಿಂಗಳ ಹಿಂದೆ ಊರಿಗೆ ಮರಳಿ ತನ್ನ ಪೂರ್ಣವಧಿಯ ವೃತ್ತಿಯನ್ನಾಗಿ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದಾರೆ.ವಿಶ್ವನಾಥ ಅವರ ಮನೆಯ ಹಿಂಭಾಗ ಹಾಗೂ ಎಡಪಾಶ್ರ್ವದ ಜಮೀನಿನಲ್ಲಿ ಮಲ್ಲಿಗೆಯನ್ನು ಬೆಳೆಸಿದ್ದಾರೆ. ಸುಮಾರು 150ಕ್ಕಿಂತಲೂ ಅಧಿಕ ಹೂ ಬಿಡುವ ಮಲ್ಲಿಗೆಯ ಗಿಡಗಳು ಇದೆ. ಸ್ಥಳೀಯ ಸರಕಾರಿ ಶಾಲೆಯಲ್ಲಿ ಅತಿಥಿ ಶಿಕ್ಷಕಿಯಾಗಿರುವ ಇವರ ಪತ್ನಿ ಸೌಮ್ಯಲತಾ ಮಲ್ಲಿಗೆ ಕೃಷಿಯ ನಿರ್ವಹಣೆಯನ್ನು ನೋಡಿಕೊಳ್ಳುತ್ತಾರೆ. ಉತ್ತಮ ಇಳುವರಿ ಬಂದಾಗ ಮಲ್ಲಿಗೆ ಬಂಪರ್ ಆದಾಯವನ್ನು ನೀಡುತ್ತದೆ. ಗಿಡಗಳ ಲಾಲನೆ ಪಾಲನೆ ಉತ್ತಮವಾಗಿದ್ದಷ್ಟು ಗಿಡ ಉತ್ತಮ ಇಳುವರಿ ನೀಡುತ್ತದೆ.

ಬಸಳೆ ಹಾಗೂ ತೊಂಡೆ ತರಕಾರಿ:

ವಿಶ್ವನಾಥ ಪೂಜಾರಿಯವರು ಮುಂಬೈಯಲ್ಲಿ ಇರುವಾಗಲೇ ಕಾರ್ಮಿಕರ ಮೂಲಕ ಊರಲ್ಲಿ ಬಸಳೆ ಕೃಷಿ ಮಾಡಿಸುತ್ತಿದ್ದರು. ಸಿಮೆಂಟ್ ಆಧಾರ ಕಂಬಗಳನ್ನು ಬಳಸಿ ವಿನೂತನ ರೀತಿಯಲ್ಲಿ ಬಸಳೆ ಕೃಷಿ ಮಾಡುತ್ತಾರೆ. ಇವರ ಮೀನು ಸಾಕಾಣಿಕೆಯ ಕೆರೆಯ ಸುತ್ತ ಸುಮಾರು ಅರ್ಧ ಎಕರೆ ಜಮೀನಿನಲ್ಲಿ ಬಸಳೆ ಬೆಳೆಯುತ್ತಿದ್ದರು. ಈಗ ಊರಿಗೆ ಮರಳಿದ ಬಳಿಕ ಸ್ವತಃ ತರಕಾರಿ ಬೆಳೆಯುವ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಮನೆಯ ಮುಂಭಾಗ ತೊಂಡೆಕಾಯಿಯ ವಿಶಾಲ ಚಪ್ಪರವನ್ನು ನಿರ್ಮಿಸಿದ್ದಾರೆ. ತೊಂಡೆಕಾಯಿ ಬಳ್ಳಿಗಳು ಹರಡಲು ಸಿಮೆಂಟ್ ಕಂಬಗಳ ಚಪ್ಪರವನ್ನು ರಚಿಸಿಕೊಂಡಿದ್ದಾರೆ. ಅದರ ಸುತ್ತಲೂ ಹಸಿರು ನೆಟ್ ಹಾಕಿದ್ದಾರೆ. ಇದರ ಒಳಗೆ ನಾಟಿ ಕೋಳಿ ಸಾಕಾಣೆ ಮಾಡುತ್ತಿದ್ದು ತರಕಾರಿ ಬೆಳೆಯುವ ಜೊತೆಗೆ ಕೋಳಿ ಸಾಕಾಣಿಕೆÀಯನ್ನು ಮಾಡುವ ವಿನೂತನ ವಿಧಾನವನ್ನು ಕಂಡುಕೊಂಡಿದ್ದಾರೆ. ಮನೆಯ ಬಲಭಾಗ ಸುಮಾರು ಅರ್ಧ ಎಕರೆ ಜಮೀನಿನಲ್ಲಿ ಅಡಿಕೆ ತೋಟ ಇದೆ. ಇದರ ಸುತ್ತ ಬಾಳೆ, ಹಣ್ಣಿನ ಗಿಡಗಳನ್ನು ನೆಡಲಾಗಿದೆ.

ಸಿಹಿ ನೀರಿನ ಮೀನುಗಾರಿಕೆ:
ವಿಶ್ವನಾಥ ಪೂಜಾರಿಯವರು ಮುಂಬೈಯಲ್ಲಿ ವೃತ್ತಿಯಲ್ಲಿರುವಾಗಲೇ ಸುಮಾರು 5 ಲಕ್ಷ ರೂಪಾಯಿ ವಿನಿಯೋಗಿಸಿ ಸುಮಾರು 1 ಎಕರೆ ವಿಸ್ತೀರ್ಣದ ಜಮೀನಿನಲ್ಲಿ 4 ಕೆರೆಗಳನ್ನು ನಿರ್ಮಿಸಿ ಲೀಝ್‍ಗೆ ಕೊಟ್ಟಿದ್ದರು. ಇದೀಗ ಊರಿಗೆ ಮರಳಿದ ಬಳಿಕ ನಾಡ ಮೀನುಗಾರಿಕೆಯಲ್ಲಿ ಆಸಕ್ತಿ ಹೊಂದಿ ಒಂದು ಕೆರೆಯಲ್ಲಿ ಮೀನುಗಾರಿಕೆ ಆರಂಭಿಸಿದ್ದಾರೆ. ಇವರ ಕೆರೆ ನೇತ್ರಾವತಿ ನದಿಯ ಕಿನಾರೆಯಲ್ಲೇ ಇರುವುದರಿಂದ ಬೇಸಗೆಯಲ್ಲೂ ನೀರಿನ ಒಸರಿನ ಅಂಶ ಇರುವುದರಿಂದ ಮೀನುಗಳ ಸಾಕಾಣಿಕೆ ನೀರು ಹಾಕಬೇಕಾದ ಪ್ರಮೇಯವಿಲ್ಲ. ಕೃಷಿ ವಿಜ್ಞಾನ ಕೇಂದ್ರದ ಮಾಹಿತಿ ಪ್ರಕಾರ ಒಂದು ಚ.ಮೀ.ಗೆ ಒಂದು ಮೀನು ಹಾಕಬೇಕಿದ್ದು, ಆದರೆ ಇವರು ಹೆಚ್ಚುವರಿ ಮೀನಿಮ ಮರಿಗಳನ್ನು ಹಾಕಿದ್ದಾರೆ.

ವಿವಿಧ ತಳಿಗಳ ಸಾಕಾಣಿಕೆ

ಪ್ರಸ್ತುತ ಅವರ ಒಂದು ಹೊಂಡದಲ್ಲಿ ಕಾಟ್ಲ, ರೋಹು, ಸಾಮಾನ್ಯ ಗೆಂಡೆ ಮೀನಿನ ತಳಿ ಇದ್ದು, ಮತ್ತೆರಡು ಹೊಂಡಗಳಲ್ಲಿ ಒಂದರಲ್ಲಿ ಕಾಟ್ಲ, ಜಯಂತಿ ರೋಹು ಹಾಗೂ ಸಾಮಾನ್ಯ ಗೆಂಡೆ, ಮತ್ತೊಂದರಲ್ಲಿ ಪಿಂಪಿಯೇಟರ್, ಕಾಟ್ಲ, ಸಾಮಾನ್ಯ ಗೆಂಡೆ ಸಾಕುವ ಯೋಚನೆ ಇದೆ. ಇವುಗಳಿಗೆ ನೆಲಗಡಲೆ ಹಿಂಡಿ, ಅಕ್ಕಿ ತೌಡು ಆಹಾರವಾಗಿದ್ದು, ಪ್ರತಿ 90 ದಿನಗಳಿಗೊಮ್ಮೆ ಆಹಾರದ ಪ್ರಮಾಣವನ್ನು ದ್ವಿಗುಣಗೊಳಿಸಲಾಗುತ್ತದೆ. ಪ್ರಾರಂಭದ 90 ದಿನಗಳ ಬಳಿಕ ರೆಡಿಮೇಡ್ ಫೀಡ್‍ಗಳನ್ನು ಕೂಡ ನೀಡಬಹುದಾಗಿದೆ.

ವರದಿ: ಸಂದೀಪ್ ಸಾಲ್ಯಾನ್

Related posts

Leave a Reply

Your email address will not be published. Required fields are marked *